Бицъоты Гриш

Бицъоты Хадзумары фырт Гриш (райгуырдис 1932-æм азы сыфтæры мæйы 21-æм боны Ставд Дурты — амардис 2014-æм азы) у ирон фыссæг.

Цардафыст

Бицъоты Гриш райгуырдис Ставд Дурты. Уым арвыста йæ сабибонтæ. Скъоламæ дæр уым бацыд, фæлæ 1945-æм азы йæ ныййарджытимæ ралыгъдысты Черменыхъæумæ. Астæуккаг ахуырад райста уым 1950-æм азы.

Уый фæстæ каст фæцис Цæгат Ирыстоны паддзахадон педагогон институты филологон факультет (1955-æм азы) æмæ, йæхи айв литературæйæн снывонд кæнын кæй сфæнд кодта, уый тыххæй ахуыр кæнынмæ бацыд Мæскуыйы Максим Горькийы номыл Литературой институтмæ.

Афтæмæй, 1960-æм азы Литературой институт каст куы фæцис, уæд æрыздæхт Дзæуджыхъæумæ æмæ куыста Цæгат Ирыстоны республикой газет «Рæстдзинад»-ы редакцийы литературой кусæгæй. 1961 — 1972-æм азты уыд чингуыты рауагъдад «Ир»-ы аивадон литературæйы редактор, стæй —Цæгат Ирыстоны Фысджыты цæдисы литконсультант, куыста журналтæ «Мах дуг» æмæ «Ногдзау»-ы редакциты.

Сфæлдыстад

Йæ фæстæ ныууагъта дзæвгар сфæлдыстадон бынтæ: радзырдтæ, уацаутæ, романтæ, публицистон уацтæ, очерктæ. Се ’хсæн — «Цæргæс тæхгæйæ фидауы» (1962); «Мæхи ном уын нæ зæгъын» (1967); «Норст цæхæр» (1969); «Арвы айдæн» (1981); «Удыбæстæ» (1982); «Зæххыл иунæг хъæу — Ставд-Дуртæ» (1995); «Уыцы бæстæм, Нанамæ» (2002); «Кæрдæджы стъалы» (2003) æмæ æнд.