Касутæ

Куадзæнæй дыууæ къуыри фæстæдæр вæййы Касутæ, хонынц ма йæ Донмæцæуæн бон.

Бæрæгбон хъæубæстæ арæзтой иумæ, ацыдис-иу тынг хъæлдзæгæй. Фидæн азмæ-иу равзæрстой куывды фысым, æмæ йын-иу йæ хæдзармæ арвыстой æртæ чъирийы. Уымæй уæлдай ма иу алчи йæ хæдзары скодта æртæ чъирийы, скодтой-иу алыхуызон кастæ, æмæ иу сæ сылгоймæгтæ семæ ахастой доныбылмæ.

Уыцы бон ма иу сылгоймæгтæ ног чындзыты хуыдтой донмæ. Устыты хистæр сæ фæдзæхста хуыцау æмæ зæдтыл, ракуывтой-иу, цæмæй чындзытæн райгуыра авд лæппуйы æмæ иу чызг. Ратабу-иу кодтой, цæмæй дæттæ ма ивылой. Нæлгоймæгтæй доныбылмæ цыдис æрмæст чындзæн йæ къухылхæцæг, æмдзуарджын æмæ хуызисæг. Чындз-иу хъуамæ доныбылæй дон æрбахастаид.

Касутæ мах рæстæджы чысыл айрох, фæлæ ма ис ахæм хъæутæ æмæ мыггæгтæ, кацытæ йæ кæнынц.