Родс, Сесил

Сесиль Джон Родс (англ. Cecil John Rhodes, 1853-æм азы 5 июлы — 1902-æм азы 26 мартъийы) — англисаг æмæ хуссар-африкæйаг политикон архайæг, амалиуæггæнæг, англисаг колониалон экспансийы разæнгардгæнæг æмæ идеолог, алмазтæ къахæн компани «Де Бирс»-ы бындурæвæрæг.

Сесиль Родс

Сесил Родс йæхи нымадта Бритайнаг империйы идеологтæй иу премьер-министр Бенджамина Дизраэлийы фæдоныл. Дизраэлимæ гæсгæ Стыр Британийы уæвынæн ахсджиаг у йе ’гæрон колониалон экспанси. Сесил Родс «Уырныны символ», зæгъгæ, ахæм сæргондæй цы чиныг ныффыста, уый мидæг фыссы, дунейы хицауад хъуамæ суа амалхъомтæ æмæ политикты сусæг къорд. Уыцы къорд, дам, хъуамæ йæхи дæлбар бакæна «хъæддаг дунейы» алы адæм дæр æмæ, дам, уый фæстæ «æппæтдунеон империйыл» æцæгæй дæр Хурзæрин никуы кæндзæн ныгуылгæ.

Кæй зæгъын æй хъæуы, Родсы хъуыдымæ гæсгæ уыцы ног дунейы разæнгардгæнджыты бынатмæ схызтаиккой англис. «Мæн фидар уырны, — фыста Родс, — мах дунейы æппæты хуыздæр наци кæй стæм, уый. Æмæ та дунейы цас фылдæр хай æрцæрын кæндзыстам мах, уыййас хуыздæр уыдзæн æппæт адæймагадæн дæр». Уыдæттæ куы фыста, цыдис ыл фонд æмæ ссæдз азы.

1891-æм азы Родс ус-паддзахæй райста Хуссар Африкæйы ног «паддзахады мидæг паддзахад» саразыны бар. Уый ном уыдис «Бритайнаг Хуссар Африкæйы компани». Компанийы хицауы бартæ уыдысты æгæрон: йæ бон уыдис йæхи æфсад аразын, ног фидæрттæ æмæ сахарты бындур æвæрын æмæ афтæ дарддæр. Родсы дæлбар тагъд рæстæджы баци егъау зæхх, фондз Англисы æмйас. Уыцы ног бæстæйæн сæвæрдтой Родсы ном — Родези.

Сесиль Джон Родс амардис 48-аздзыдæй. Бинонтæ йын нæ уыдис.