Уататы Бимболат

Уататы Зауырбеджы фырт Бимболат (Бибо) (райгуырдис 1939-æм азы 15 мартъийы, Ног Бæтæхъойыхъæуы — амардис 2000-æм азы, Дзæуджыхъæуы) уыдис ирон театр æмæ кинойы актёр.

Уататы Бимболат
Райгуырды датæ	1939-æм азы 15 мартъийы(1939-03-15)
Райгуырæны бынат	Ног Бæтæхъойыхъæу, Рахизфарсы район, Цæгат Ирыстоны АССР, Уæрæсейы СФСР, Советон Цæдис
Мæлæты датæ	2000-æм азы 9 майы(2000-05-09) (61 азы) кæнæ 2000-æм азы 9 мартъийы(2000-03-09) (60 азы)
Мæлæты бынат	Дзæуджыхъæу, Уæрæсе
Æмбæстонад	Советон Цæдис  Уæрæсе
Професси	актёр
Карьерæ	1962 —
Хорзæхтæ
IMDb	ID 0890893

Цардафыст

Райгуырдис Цæгат Ирыстоны, Ног Бæтæхъойыхъæуы. Скъолайы фæстæ, 1959-æм азы ссис Цæгат Ирыстоны музыкалон-драмон театры артист, уый фæстæ бацыдис Б. Щукины номыл Сценаристтæ æмæ режиссёрты уæлдæр курсытæм. Каст сæ фæцис 1964-æм азы.

1969–1975 азты Бибо уыдис киностуди «Таджикфильм»-ы актёр æмæ телефильмты режиссёр. Æдæппæтæй Уатайы-фырт ахъазыдис 200 ролæй фылдæр.

1994–1998 азты Уататы Бибо уыдис Цæгат Ирыстоны культурæйы министрады сæргъы.

Амардис Уатайы-фырт 2000-æм азы. Ныгæд æрцыдис Дзæуджыхъæуы Намысы Аллейы.

Артисты ном хæссынц Дзæуджыхъæуы æмæ Беслæны уынгтæ.

Хæрзиуджытæ

• Цæгат Ирыстоны адæмон артист;
• Уæрæсейы адæмон артист;
• Таджикистаны ССР-ы Рудакийы номыл Паддзахадон преми;
• Хетæгкаты Къостайы номыл премии;
• Тæбæхсæуты Балойы номыл преми.
• Астæуккаг Азийы кинофестивалы (Ашхабад, 1966) нымад æрцыдис хуыздæр нæлгоймаг актёрыл (киноныв «Хасан-арбакеш»).

Зынгæдæр рольтæ

Театры

• Таймураз — Гаглойты Владимиры «Уарзты таурæгъ»;
• Данко — Тыбылоны «Æхсидгæ зæрдæ» (Максим Горькийы уацмыстæм гæсгæ);
• Аслæнбег — Саламты Къолайы «Сæрмæт æмæ йæ фырттæ»;
• Сослан Цæразон — Плиты Грисы «Сослан Цæразон»;
• Дими — Хуыгаты Георы «Фыдæлты намыс»;
• Чермен — Плиты Грисы «Чермен»;
• Клавдий — Шекспиры «Гамлет»;
• Лука — М. Горькийы «Царды бын»;
• Къарол Лир — Шекспиры «Къарол Лир»;
• Паддзах Эдип — Софоклы «Эдип-паддзах».

Кинойы

• «Чермен» — Чермен;
• «Рустам и Сухраб» — Рустам;
• «Именем закона» — Мехман;
• «Огненные дороги» — Садыкджанбай;
• «Год дракона» — Махмуд;
• «Кънйаз Игорь» — Кончак;
• «Войди в мой дом» — Даароп;
• «Раненные камни» — Осман

Библиографи

• Гудиев Г. Полет орла: в латах и без них: [о Бибо Ватаеве] // Вершины. Владикавказ: Ир. С. 85–89;
• Бекоева Р. Неправда, что незаменимых людей нет // Слово. 2000. 17 июля;
• Гокоева К. Год без Бибо (Ватаева) // Северная Осетия. 2001. 8 мая;
• Томаева А. Твоей судьбы счастливая звезда: Б. Ватаев, лауреат премии Каста // Престиж. Владикавказ: Иристон, 2004. С. 71–106.